ARTEMIS BATONGBUHAY

Suliranin ito ni Bibeth*.

Wala siyang agarang maisip.

Maitim ako’t tatawaging Mang Tem-i.

Pero hindi ako dapat mabuhay lamang sa bansag.

Dapat may identidad.

Kaya Artemis Batongbuhay.

Dahil ekstra lamang, hindi ko ito tuloy nasabi:

Bibeth, babae si Artemis.

Ginahasa ni Orion.

Anak ng diyos-Griyego.

Mangangaso.

Pumatay.

May sampalataya ako sa manunulat.

Importante ang trabaho kahit pagago.

Ano ba kung wala ang apelyido ko sa Catalogo.

Sa istorya, para maipwesto ang kadidiskubreng Fil-Am,

Paparesan ako ng isang babaeng maganda.

Sa istorya, ibigin ko man,

Kailanma’y hindi kami magseseks.

Sa istorya, lahat ay maiinggit sa akin.

Maano ba kung maitim.

Ang mahalaga ay kasama sa casting.

Negosyanteng may kantin.

May tsimoy na tisoy.

May kaparehang tisay.

May tatanga-tangang goon.

Binuhay ako ni Bibeth

Sa lubhang karaniwang sitcom,

Napabilang sa pelikula paminsan-minsan.

Maiikutan ng episode,

Paminsan-

Minsan.

Artemis. Tem-i. Bakit hindi Artemio?

Sagot ni Bibeth: dahil sa sensibilidad-Filipino,

Temyong ang palayaw ng lahat ng Artemio.

O Art kung sopistikado.

Bakit Batongbuhay? Bakit hindi kesong-puti?

Sagot ni Bibeth: pamigay, hindi ka ba nag-iisip?

Pagmunihan mo nga ang Victorio Ungasis.

Dapat balintuna ang ngalan.

Maliit at malaki. Itim at puti. Tanga at tagumpay.

Anak ng diyos at bato.

At nito ko na lamang nadili, hindi gaya ni Oriong

Kumikinang sa alapaap maging ang sinturon,

Nasa lupa ang batongbuhay,

Walang-wala sa kalawakan

Ang tauhang, dahil sa balat,

Naunang kathain ang alyas.#

---

* Bibeth Orteza

Galing dito ang larawan: http://i137.photobucket.com/albums/q216/carlbo12/mang_temi.jpg

Salamat bro (o sis) kung sino ka man.

MATUT(INA)

Hindi dumako sa pangarap ko tuwing Miyerkules
Sa tsanel 9 ng aking kamusmusan
Ang maging kapatid sa labas ni Marsha,
O maging ampon ng kanilang pamilya.
Sapat na ang maging anak ni Matutina.
Nakulili ako sa matinis na paghihistori ni Miss Ecija
Kaya matitiis kong maging ina si Matutina,
Basta’t maging tagawalis din ako ng pera sa sala.
Kapag natapos na ang palabas sa walang
Pangal na “Kaya ikaw John, magsumikap ka!”,
Hindi ako makatingin nang tuwid na tuwid
Sa aking inang nakangiti’t nag-iinat.
Dinuduro ako ng konsiyensiya ng Safeguard,
Dahil sa lihim kong paghalili sa kaniya kay Matutina
Sa loob ng isang oras, tigib ng patalastas,
Masayang-masayang palabas.#










galing dito ang larawan: http://media.photobucket.com/image/MATUTINA/cute_piglet93/matutina.jpg


kung sino ka man cute_piglet93, salamat.

PURUNTONG

Aminin mo, minsan ka ring nagsuot nito.

Komportable’t makulay na rilyebo ng karsonsilyo.

Mumurahing pang-swimming,

Panloob sa hamak na luwag ng pantalong

Umaabang sa paglaki’t takot mapaglumaan,

Makalakha’t maipamigay sa sinumang kapos

Na nakababatang kapatid, kalaro, o kamag-anak.

Gaya ng nagbabalat-balatang sapatos na itim

Na tinawaran ni Ina isang binabahang pasukan.

Malaki ng dalawang pulgada ang malapapel,

Pumapapel na Top-sider na nakatanod sa pagbibinata:

Naghihintay sa paglipas ng pag-umbok

Ng gulong-gulungan, dagsa ng taghiyawat,

Sumisinsing pagpiyok, at siguradong paglapad,

Paghaba ng paa. Hindi ang tigbebenteng

Sukat na sukat na puruntong.

Kapag lugapi na, deretso-trapo

Itong kailanma’y hindi ordinaryong salawal

Na hindi sinasadyang mapasikat

Ng aktor na tumanyag sa pagpapatawa’t

Pagganap sa karukhaang hindi miminsang

Napagkamalan kong tunay na tunay.#

galing dito ang larawan: http://pinoyexchange.com/forums/showthread.php?p=27483167

salamat kung sino ka man.

Kampanya

Kampanya

May nabubuong reporma sa asó ng kape.
Wala na ang dating pagpapaawa, paglilitis
Sa sariling ibinahog sa mahahabang salaysay

At talumpati. Matamis ang cinnamon at
Nakakaumay ang pang-araw-araw na gatas.
Bakit wala ito sa polyeto at pamphlet?

Sa plataporman-de-gobyerno?
Gabi-gabi itong caucus ng americano, sumatra, at
Robusta pero hanap ko pa rin ng amoy putik, lasang

Putik, sabuyan ng putik sa halakhakan at
Paos na PA system. Garalgal ang tinig ng mga isyu
Ng media at kapihan, bagong pormula ng kape sa

Bawat urban poor kolektib. Karistimatiko talaga
Ang kalabang partido, na kahit paspas ako
Sa paglalakad, napapakupad sa gara ng

Naghuhumindikang poster, tarpaulin.
Sa dami ng pakulo, gimik, mga artista. Sobrang
Pait, sobrang tapang talaga ng double espresso, bakit ba

Ito ang naorder ko, on-the-go? Naparami tuloy ang
Creamer, sweetener ng aking sinabi, hindi ko tuloy
Nasunod ang bilin ng PR idyer. H2H sa Area 2, may

Demo job sa akin, may padebate ang parokya.
Ano ang sarap ng pakla ng kape, kung wala
Ang pakla’t usok ng sigarilyo? Alam ko namang

Hindi ang pangalan ko ang pasan ninyo.